FAMIANAN DI BONEIRU

Na okashon di Dia di Rincon, Boneiru 30 di aprel 2007.

Renobá 7 di mei 2007

Ku e promé vershon di e website aki mi ke kompartí ku komunidat boneriano i tur otro interesado e resultado di un investigashon genealógiko ku mi hasi durante e periodo di 1993 - 2006.

Despues por sigui otro vershon ku tal bes otro interpretashonnan.

Ta mi deseo pa e site aki sirbi komo un plataforma di idea tokante e boneriano i su historia i ku kualke vershon ku sigui despues lo kontribuí na un aserkamentu mas ophetivo di historia di Boneiru.

E publikashon aki ta konsistí di dos parti:

1. Nòmber di tur habitante di Boneiru entre aña 1700 te 1900.

2. Desaroyo di famianan boneriano.

E investigashon a keda hasí únikamente ku dokumentonan outéntiko di archivonan di Archivo Nashonal na Kòrsou, het Nationaal Archief na Den Haag (te resien Algemeen Rijksarchief) i Registro Sivil di Boneiru.

Datonan di katibu di WIC ta saká for di lista di inventario di katibu di West-indische Compagnie na Rijks Archief na Den Haag.

Datonan di persona liber i di katibu ku a atkerí nan libertat ta saká for di Registro di Nasementu, Matrimonio i Fayesimentu na Boneiru entre añanan 1830 i 1900.

Datonan di e katibunan di Rei (Gobièrnu) i di Shon (partikulir) ta saká for di korespondensia ku Ministerio di Kolonia wardá na Archivo Nashonal na Kòrsou.

Nos ke remarká ku nos no a hasi uzo di interpretashon di personanan ku a studia i publiká e materia aki den pasado, di kual mester menshoná Dr. J. Hartog,

R.H. Nooijen o.p. i e tantísimo publikashonnan di siudadano Bòi Antoin.

1. Nòmber di tur habitante di Boneiru entre añanan 1700-1900

E promé parti aki ta duna e genealogia di e pueblo boneriano den e promé siglonan (1700-1900) i ta repartí den kuater kategoria di famia.

A   Katibu di Westindische Compagnie (WIC) B   Katibu di gouvernement C   Katibu di partikuliernan D   Habitante liber na Bonaire

1700 te ku 1791 1800 te ku 1863 1800 te ku 1863 1800 te ku 1900

A. Ta repartí e promé kategoria, katibunan di WIC den 4 grupo:

1. Katibunan ku a forma famia i asina pone base pa e komunidat di Boneiru.

2. Katibunan ku durante e periodo aki a ser kumprá.

3. Katibunan ku nòmbernan original di Afrika.

4. Katibunan ku nòmber krioyo.

B. Ora WIC a stòp di eksistí na 1791 nan a pasa tur nan katibunan pa Gobièrnu i ta p’esei tambe ku nos ta haña e katibunan aki te na 1863 riba e listanan di inventario di Gobièrnu.

C. E di tres kategoria ta katibu di Shon. Na aña 1863, na momentu di abolishon di sklabitut, tur doño di katibu a risibí un suma di 400 florin di Gobièrnu pa kada katibu.

D. E último kategoria ta personanan ku despues di 1791a haña pèrmit di Gobièrnu pa establesé na Boneiru.

Método di trabou pa hinka e registro di persona den otro.

Pa yega na e publikashon di famianan mester a saka kada persona for di tres diferente registro pa konstruí un solo Registro di Persona.

Den Registro di Persona kada persona ta ser identifiká ku un òf mas fecha, por ehèmpel di nasementu, matrimonio òf fayesimentu.

Uzo di kòmpiuter tabata indispensabel, mas di dies mil nòmber, pa yega na e Registro di Persona.

Mester tene kuenta ku e echo ku ta identifiká kada persona ku un òf mas dato di e registronan di Boneiru; seguidamente e ta ser identifiká den relashon ku su famia. Pues un persona su so, sin famia, ni maske e tabatin un funshon importante den servisio di WIC manera commandeur òf opzichter, tòg no ta aparesé den e sistema.

Tin vários nòmber den e tres registronan menshoná di kual no tin sufisiente informashon, konsekuentemente por lo pronto no por a inkluí nan.

2. Desaroyo di famianan boneriano.

Método di trabou pa e di dos parti.

Pa e parti aki a hasi uzo di korespondensia entre funshonarionan i nan superior den kual nan ta duna kuenta di nan tarea.

Lista 1. Relato di kaptan i médiko bordo di barkunan ku a transportá katibunan pa nos region.

Lista 2. Plantashinan di Kòrsou, kantidat di katibu i krio di bestia.

Lista 3. Fayesimentu di katibunan.

Lista 4. Algun katibu i nan trabou ehersé na Kòrsou na aña 1722.

Lista 5. Katibunan di Boneiru na aña 1744.

Lista 6. Katibunan na Kòrsou na aña 1855 di kual mayoria ta di Boneiru.

Journal di commandeurnan despues di 1828.

Relatonan anual di diferente commandeur.

Korespondensia ku Minister di Kolonia na Hulanda.

Edishonnan di Curaçaosche Courant for di 1822.

Promé famianan di Boneiru.

1. Di orígen indjan.

Ta lástima ku no por a inkluí e indjannan ku pa hopi siglo a habitá nos isla di Boneiru, pasobra nunka nan no a ser registrá ningun kaminda, maske ku nan tabata kai bou di un “kapitein van de Indianen” tempu di WIC. Tokante nan sistema di biba nos por lesa den publikashonnan di Frans Booi i estudionan arkeológiko ku Jay Haviser a hasi aki na Boneiru. Publikashonnan di Luc Alofs i di R.H. Nooijen o.p. tokante historia di Aruba i Boneiru den futuro lo por yuda trese mas klaridat enkuanto e poblashon indjan.

2. Di orígen afrikano.

E promé katibunan den relashon familiar a keda registrá na 1744. Riba e lista di inventario aki ta aparesé pa promé biaha nan famnan. Algun ehèmpel: Anthonica, Bomba (Anthony Bomba), Coffie, Datto, Domacasse, Foluba, Frans, Goeloe, Janga, Makaai, Wanga. Nos por ripará ku den e nòmbernan aki tin e sekuensia di alfabèt. Nos ta yama nan e promé famianan boneriano pasobra mayoria di nan yunan i nietunan a nase aki na Boneiru i nan antepasadonan no tabata aki nan.

3. Di orígen europeo.

For di 1709 Pieter Boom tabata asistènt siruhano na Boneiru i tabatin tambe kuater kabayerista i un sòldá.

Na1758 nos ta haña e nòmbernan Theunis Kock, Jan Evertsz, Jan Gijsels, Charles Bousingh.

Na 1764 Michael Romer, Cornelis Boekhoudt.

Na 1769 Thielman, Bislik i Daal.

Na 1780 Christiaan Dammers, Frans de Jongh.

Na 1782 Frans Thode i Semeler.

Na 1787 Gerrit Raenes.

Di e ámtenarnan aki nos no tin informashon di nan kasá i nan yunan den registro di Boneiru.

Un kos ta sierto ku algun di e europeanonan aki a kasa despues ku muhénan indjan.

Traspaso di kultura afrikano.

Ora analisá diferente kargashon di barku di katibu (mira anekso lista 1) nos ta ripará ku na bordo tabatin un kantidat signifikante di mucha (19%) i asta yu na lechi. Ora e kargashon yega Kòrsou tabata bende mayoria di e katibunan adulto ku paisnan di kontinente merikano. E ora ei e famianan hóben tabata keda atras den e plantashinan lokal di West Indische Compagnie (mira anekso lista 2).

Entre añanan 1700 i 1744 (mira tambe Norbert Hendrikse) ta skohe un kantidat di famia for di nan i barka nan manda Boneiru.

E barkunan di katibu tabata sali for di diferente pais na Golfo di Guinee manera Guinea, Ghana, Dahomey, Kongo, Angola. Komo ku e katibunan tabata bini di diferente pais, nan no tabatin un idioma komun.

Alrededor di 1730 ta amplia e grupo bieu na Boneiru ku famianan hóben for di Kòrsou. Mira grafik aki bou. E grupo nobo aki no ta integrá fásilmente ku e grupo bieu, pa falta di un idioma komun. Loke nos ta mira den e grafik aki bou ta tambe ku e grupo di edat avansá ku nòmber afrikano ta bira ménos i e grupo di famianan hóben ta sigui oumentá. P’esei traspaso di kultura afrikano meramente a tuma lugá.

Desaroyo di nòmber i fam.

Na yegada di e diferente barkunan for di kosta di kontinente di Afrika tabata marka e katibunan adulto ku heru kayente ku un number ku probablemente tabata number di e kargashon di e barku konserní. (mira anekso lista 3 i 4)

Na aña 1701 e number ta alkansá e sifra 100 i numerashon ta sigui ku lèter di alfabèt, di A te Z.

Luego nos ta distinguí den inventario di aña 1744 dos kategoria di nòmber. Un grupo mas bieu ku nòmber ku zonido afrikano (masienga, mafongo i mabiela) i un generashon mas hóben ku nòmbernan kristian i pa promé biaha ku fam di e mama di e famia. (Athonica, Bomba, Coffie, Datto, Domacasse, Frans, Goeloe i Wanga (Guanica).

Ora WIC terminá e aktividat aki na 1791 ta pasa tur katibu pa Gobièrnu.

E añanan turbulento ku ta sigui di vários okupashon di nashon ingles i despues franses ta terminá na 1816 ora ku definitivamente e isla ta pasa den man di Gobièrnu hulandes.

Na aña 1816 nos ta haña un kantidat grandi di nòmber nobo di famia. Ora bai analisá ta haña un bon splikashon ku mayoria nòmber di famia nobo ta derivá di nòmbernan kristian ku nos konosé kaba. Algun ehèmpel:

E fam Emerentiana ta originá di Francisca Emerentiana Frans. (1776)

E fam Regales ta di Martha Regalis Frans. (1785)

E fam Bernabela ta di Maria Bernabella Wanga. (1781)

Otro nòmbernan nobo ta bini pa medio di manumissie; esaki ta nifiká ku Gobièrnu ta duna e katibu un nòmber nobo ora esaki haña òf kumpra su libertat.

Famnan manera Goedgedrag, Ijver i Vlijt a originá dje manera aki.

E fam Zustermin ta un nòmber nobo pa un muhé katibu ku sa duna pechu (min) na yu di famía Leseur. (zuster)

Katibunan di shon ta haña nòmber ku ta referí na nan doño.

Ehèmpel: Seraus, Booi, Beukenboom, Torbed i Moob ta derivá di resp. Suarez, Boyé, Boekhoudt, Debrot i Boom.

E famnan Beaumont i Keller ta parse ku ta referí na antepasadonan franses i aleman, pero esaki no ta e kaso.

Beaumont ta duná pa manumissie na Luis, yu di Inees Coffie (1858).

Keller ta duná na Johannes, yu di Maria Thomas ku ta yu di Susanna Frans.

Minguel Goedgedrag, anteriormente menshoná, ta yu di Anna Dortalina (1849).

Anna Dortalina ta yu di Martha Criool (1776).

E katibu Felixiana Emerentiana mes a kumpra su seis yunan liber entre 1845 te 1855 i nan ta haña famnan ku ta derivá di fam di nan mama, esta:

Emer, Merens, Emerens i dos nòmber sekreto, esta Felister (Filister) i Wajampibo.

Felixiana mes ta entregá un petishon pa e karga e fam de Palm. E petishon aki ta keda aseptá na 1868 pa desishon di hues.

Felixiana Emerentiana tabata pertenesé na un famia previligiá. E mes tabata sirbiente di pastor i su ruman hòmbernan tabata bomba, su yu Merens tabata kaptan i doño di un barku, su yu Maria Luisa ku e fam Wajampibo tabatin diferente propiedat i tambe katibu, su yu Eleuteria a drenta kombentu i Amalia a kasa na 1858 ku Eduard Schermer, un dje yu hòmbernan di Jacob Schermer.

Splikashon di nòmbernan sekreto Wajampibo i Felister.

WAJAMPIBO:

Si lesa e nòmber Wajampibo den un spil ta sali e kombinashon di nòmber

E g i d (ius) w i l l e m.

Egidius ta tata di Willem Palm. (mira lista di personanan liber den parti 1)

Willem Palm tin mes edat ku Francisca Emerentiana, mama di Felixiana Emerentiana. (mira lista di katibu di Rei den parti 1)

FELISTER:

E promé dos sílabanan FELI nos ta haña den e nòmber FELIXIANA i e último sílaba STER ta “Ster” ku ta nifiká strea i ta skibié ku e símbolo X i e lèter aki nos ta haña tambe den e nòmber FELIXIANA.

Felister lo por a referí tambe na Felix Curiel ku a yama su barku Maria Luisa.

Matrimonio entre e diferente rasanan.

Despues ku durante shen aña práktikamente e rasanan no a meskla, e situashon ta kambia despues di 1791 ora a pasa e katibunan di West Indische Compagnie pa Gobièrnu i hendenan partikulir tabata permití pa establesé nan mes na Boneiru.

Algun matrimonio entre hendenan partikulir i katibu di Rei na Boneiru:

1848 Martis Trinidad x Anna Theresa Sabel.

1859 Eduard Schermer x Amalia Emer.

1863 Lucas Pourier x Mercelina Janga.

Lucas Pourier tabata un dje yunan di Pierre Pourier ku a bira tata di famia Pourier na Boneiru.

1867 Christoffel Salsbach x Elisabeth Coffie, un katibu ku tabata traha na Kòrsou i ku na Boneiru ta bira mama di e famia Salsbach.

1899 Casper Lodewijk Neuman x Louisa Leolyda Janga.

Meskla entre personanan di orígen europeo i indjan.

Desendientenan di personanan ku tabata den servisio di WIC, manera Daal, Semeler, Boekhoudt iThode ta kasa ku muhénan indjan. E matrimonionan aki ta trese un generashon nobo di mestiso den e komunidat boneriano.

Trato di katibunan na Boneiru.

Si nos tira un bista riba e situashon di katibunan di WIC den e periodo promé ku 1800 nos ta ripará ku e poblashon boneriano nobo durante tres generashon a okupá su mes únikamente ku kria di bestia pa su mes konsumo i pa eksportashon pa Kòrsou pa Gobièrnu den Fòrti.

Areanan kaminda tabatin awa manera Fontein, Seru Moreno i Dos Pos tabata lugánan apropiá pa agrikultura i kria di bestia.

Na aña 1762 tabatin riba e isla aki 250 baka, 1165 kabritu, 465 karné i 350 kabai.

Na 1780 tabatin na Fontein103 baka i na Seru Moreno 634 karné i 830 kabritu.

No tabatin ningun prueba di krueldat, di maltrato di katibu, ni di ofensa di hende muhé.

Durante kasi un siglo a krese un komunidat di tres te kuater generashon.

Despues di e traspaso na 1791 ta fòrsa e poblashon di katibu pa bai traha den e saliñanan di salu. E ora ei a bini direpente un fin na nan bida trankil. Na establesimentunan nobo manera Guatemala, Mexico i Amboina ta kuminsá ku produkshon di maishi, cochenille i álue pa eksportashon.

Pa promé biaha ta konfrontá e poblashon ku trabounan bou di sirkunstansianan teribel.

Algun katibu ku a konosé situashon di e katibunan riba plantashinan na Kòrsou a kuminsá reakshoná.

E katibu Martis, yu di Catalina Janga, ku a yega di traha tambe na Kòrsou i na 1834 na Sürnam ta konsiderá komo e luchadó pa abolishon di sklabitut. (mira Bòi Antoin)

Segun mi por konsider’é mas bien e persona ku a bai kontra introdukshon di un forma inhumano di sklabitut na Boneiru.

Lektura adishonal
Anekso